السلام عليكم ورحمة الله وبركاته
أولادنا
بيحبوا الأندومي جدا بس كلنا بنسمع
عن ضررها علي أولادنا. ربنا يبعد عنهم جميعا
أي ضرر ويحميهم ويحفظهم اللهم آمين..
عشان كده كنت نزلت طريقة لعمل الأندومي
في البيت من مده وكانت مكوناته فيها بيض
وكانت نتيجته ممتازة...
النهارده هنزلكم طريقة تانيه للأندومي بدون
بيض والحمد لله نتيجته أيضا ممتازه جدااااا
وهتعجب أولادكم جدا جدا. ده غير إنها بدون
بيض يعني إقتصاديه
ممكن تقدميها مع التوابل اللي هقدمهالكوا
وممكن تقدميها مع شوربه لحم أو فراخ ومعاها
قطع لحم أو بدون... يعني من الآخر هترك لك
طريقة التقديم اللي يحبها أولادك ويارب بألف
هنا للجميع...
ياريت تجربيه.. أنا كتبت علي الصور للتوضيح..
الأندومي
المكونات
كيلو دقيق
كوب ماء سخن جدااااا
معلقة ملح صغيرة
الطريقة..
بتضيفي الملح للدقيق وتعجني بكوب الماء
وياريت تكتفي بكوب الماء فقط يعني متزوديش
ميه تاني عشان هي بتكون عجينه يابسة
جدا بتعجنيها علي الرخامه جيدا
ولفيها في كيس بلاستيك لمده نص ساعة ترتاح
إفرديها بالنشابة لسمك واحد سم وقطعيها كما
واضح في الصور وإفرديها في المكنه علي رقم
خمسة (5)
وشكليها في المكان اللي بنقطع فيها المخروطه
كما واضح في الصور
ومجرد تشكيلها رشي عليها نشا وإفرديها علي
صينيه وعرضيها للهواء حتي تنشف تماما
انخليها في مصفاه للتخلص من النشا
وسويها في حلة الكسكسي مع رشها بنص
كوب ميه ومعلقتين زيت وغطيها بقطعة
قماش حتي تستوي مع رش ماء لو احتاجت
تعرفي انها استوت إزاااي.. بتكون طريه وأما
تدوقيها تلاقيها طعمها حلو ومفهاش طعم دقيق
بتاخد تقريبا نص ساعة
ارفعيها من علي النار وعبيها في علبه الحجم
اللي تفضليه وإكبسي عليها وإقلبيها واتركيها
تنشف واستعمليها
كما واضح في الصور
وموضحة التوابل وكمياتها بالمعلقة الصغيره
بتاخدي معلقه من كل نوع ما عدا الكمون ربع
معلقه كفاية
وعند اضافة التوابل بتضيفي معلقة كبيرة لكل طبق
كبير أو حسب ماتحبي وأيضا ممكن تضيفي
شطة ناعمه حسب رغبتك
جربيها هتعجب ولادكم جدا جدا
مع تحياتي
الصفاوالمروة
تعليقات: 0
إرسال تعليق