السبت، 3 مايو، 2014

اسهل طريقه لعمل التشيز كيك على البارد من شيف متخصص وخفيفه وغير مكلفه




كتير بيبعتوا على مشاكلهم مع التشيز كيك وانها صعبه او بناكلها ياشيف بره فى الكافيهات وعايزين نعملها فى البيت بنفس الطعم والنهارده ان شاء الله هنعمل الوصفه بطريقه ولا اسهل من كده والاهم تركيزك فى كل كلمه بقولها عشان مش هعيدها تانى
يالا بينا التشيز كيك من الشيف ايمن العطار
المكونات


3 باكو بسكويت ساده اى نوع يعنى مش عايزك تركزى على نوع معين فى السوق
100 جرام زبده


هنفتت البسكويت مع الزبده اللى فى درجه حراره الغرفه يعنى لاتكون مجمده ولا تكون سايحه ونضربهم مع بعض كويس فى الميكسر وبعد كده هنفردهم فى صينيه التشيز كيك وهتكون دى الطبقه الاولى حوالى نصف سم هنشيل بقى الصينيه دى او القالب ده فى الثلاجه لمده نصف ساعه عشان نبتدى نجهز الطبقه التانيه ومكوناتها هتكون عباره عن


3 عدد علبة زبادى الزبادى بقى عشان يوفر معايا فى الجبنه وكمان بيكون خفيف وكمان بيدى طعم هايل مع الجبنه
125 جرام جبنة ريكوتا أو جبنة كريم
250 جرام سكر
300 جرام كريم شانتيه مخفوقة وجاهزه
2 معلقه جيلاتين بودره محلولة فى شويه مايه ساخنه
الطريقه بقى
هنضرب السكر مع الجبنه فى الماكينه وبعدين نضيف الزبادى مع الضرب المستمر وبعد كده هرفع الخليط ده كله من الماكينه واضيف الكريمه واكمل ضرب باليد وبعدين اضيف الجيلاتينه شوفتوا بقى السهوله عامله ازاى بعد كده هجيب القالب او الصينيه اللى فيها البسكويت بالزبده واصب الخليط عليها لحد ماتملى القالب او الصينيه وادخلها الثلاجه لمده 3 ساعات او الفريزر لمده ساعه على فكره اللى هتسال وتقولى حجم الصينيه اد ايه هقولها اعملى الكميه كلها وزى ماتطلع معاكى ممكن تطلع صينيتين حسب الحجم اللى عندك حطيها فى الفريزر وطلعى منها اى وقت انتى عايزاها هتعيش معاكى فى الفريزر لاكتر من 20 يوم وتقدرى بقى تجمليها بالتشوكليت او صوص الفراوله او الكراميل او التوت زى ماتحبى وبالهنا والشفا

 الشيف ايمن العطار

0 التعليقات:

إرسال تعليق

Twitter Delicious Facebook Digg Stumbleupon Favorites More