1- لما تيجى تعملي فراخ بانيه او بوفتيك افردي كيس بلاستك وحطى عليه البقسماط والتتبيلات وتبلي عليه وبعدين لما تخلصي لمى الكيس وارميه على طول كدة هتوفري غسيل طبق كمان هتحمى حوضك من الانسداد بسبب البقسماط اللي بيقع في الحوض اثناء الغسيل
2- لو وقعتى زيت على الارض متجريش تجيبى فوطة وتمسحيه لا رشيى عليه ملح وسبيه دقيقتين تلاتة وبعدين اكنسية بالمقشة والجاروف واتفاجئي بالسحر ولا اكن في حاجة وقعت
3- حطى حتة فحم في طبق صغير في اى مكان بيطلع روائح غير مستحبة زى الجزامات والتلاجات والفريزر و اى ضلفة مطبخ او خزين بتسحب كل الروائح تماما
4- لما يقع منك بيض على الارض او على التربيزة بيض نى طبعا اوعى تمسحيه بفوطة لا امسحيه بمنديل كلينكس وارمى على طول لان الفوطة بتبقى ريحتها وحشة اوى لو مسحتى بيها بيض حتى بعد الغسيل وكذلك اللبن
5- ما تمسحيش رخامات المطبخ بالكلور امسحيها بالخل بيقتل الجراسيم ومادة طبيعية
6- لو عندك حاجة نحاس متجبيش نحيتها مايه بنص ليمونة وادعكيها هترجع جديدة
7- لو عندك مكواه بخار وحاسة ان كفائتها قلت حطى في خزان الماية خل وسخنيها وسبيها ربع ساعة في الفيشة على اعلى درجة وبعدين اضغطى على دافع البخار لحد ما يتبخر كل الخل حتلاقي طلع حاجات كدة زى الطين ودى رواسب الماء لما بيغلي ويتبخر وكررى الطريقة مع مايه عادية مرتين لشطف خزان الماء وفوطة مبلولة امسحى الرواسب اللي خرجت حتلاقيها رجعت جديدة
8- عاوزة عيون البوتجاز الاستانلس تبرق انقعيها مع قشر ليمون ومايه سخنة في طبق وبعدين بصابونة وش لوكس او كامى او اى حاجة حطى منها حته على ليفه وادعكى حترجع جديدة
9- لبسي الباسكت اللي في الغرف اكتر من كيس فوق بعض بحيث يتملي واحد تشليه تلاقي واحد مكانه وبكدة توفري وقتك في تغيير الكيس كل يوم
10- دايما خلى عندك فرشة بايد
وهاتى علبة شاور جل او شامبو فاضيه وحطى فيها سائل تنظيف انا بحط كلوركس كلين اول ووانتى بتغسلي وشك الصبح حطى شوية سائل وادعكى الحوض في اقل من دقيقة بقى زى الفل
11- اول ماتصحى الصبح وانتى لسه بتلبسي شبشبك عدلي ملاية السرير والمخدات وبكدة تكونى خلصتى من مهمة يومية من غير ماتخدي باللك
12- وانتى واقفه تعملى الشاى ولا النسكافيه على ما الماية تغلي روقى درفة واحدة في المطبخ تكون عاوزة تتظبط
نصائح كمان ......
نصائح كمان ......
1 . حطي في ملاحة الطعام .. كام حباية رز عشان الملح ميتجمدش منك في ايام الرطوبة
2 . لو عندك شرابات بيضاء اللون .. عاوزاها تبقي زي الفل .. انقعيها الاول نص ساعة في ماية سخنه ومعاها لمونة متقطعة شرائح .. هتفرق كتير في النضافة
3 . لو جبتي جزمة جديدة ليكي او لحد من اولادك او حتي جوزك و اكتشفتوا انها بتعمل صوت اثناء المشي ( بتزيأء) هاتي زيت بذرة الكتان و دفيه او سخنيه و هاتي قماشة و ادهني النعل و الجناب بيه والصوت هيختفى تماماً ( مجربتوش بصراحة بس سمعت عنة )
4 . لو حطيتي كوبايتن جوا بعض و معرفتيش تخرجيهم .. حطي الكوباية الي تحت في ماية سخنه جدا .. و صبي في اللي فوق مايه ساقعة جدا . هينفصلوا بسهوله
5 . لو بتستعملى مفرمة لحمة في البيت . و حابة انك تنضفيها يسهولة ..ومن غير ما تسيب اثر لريحة اللحمة فيها .. بعد ما تخلصى الفرم هاتى قطعة عيش ناشفة و افرميها جواها .. و اغسليها . هتلاقي غسيلها سهل و مفيش روايح
6 . لو الانترية او السجادة او اي مفرش عندك اتبقع . اتعاملى مع تنضيفة بطريقة الضغط .. مش الدعك . لانك لو دعكتي البقعة هتنتشر و تكبر اكتر .. انما هتجيبي فوطة نضيفة و فيها المنضف بتاعك و تضغطي مرة ورا مرة لحد ما البقعة تختفى تدريجيا .
7 . لو عندك دهون في البوتجاز صعبة التنضيف .. هتجيبي ماية دافية و نقطتين سائل تنضيف الصحون و 3 معالق كبيرة خل .. هتفرق معاكي كتير و بدعكة خفيفة الدهون هتنضف .
8 . عشان تقللى كتير من ريحة السمك المقلى جوا البيت .. حطي في الزيت الي هتقلى فيه نص لمونة او ليمونة كاملة بس نصين . هتقلل من الريحة كتير
9 . لو عندك في التلاجة صدا او خدش مشوه شكلها نضفى المكان المخدوش او المصدي كويس و هاتى منوكير ابيض و ادهني المكان ده و سيبيه ينشف .. و هتلاقي الشكل بقي احلى كتير من الاول
تعليقات: 0
إرسال تعليق