1
بنجيب ورق بيتباع فى المكتبات اسمه ورق ناصيبيان و هو زى الكارتون ( الورق المقوى )
ممكن نشتغل على الورق على طول , و ممكن نعمل خلفية من الخيال بأى نوع من الوان
2
بنجيب 4 كروت من المكتبة ( بنفس الرسمة )
3
أول واحدة بنخليها زى ما هى
التانية بنقصص منها حتت كبيرة
التالتة بنقص التفاصيل الأصغر
الرابعة بنقص التفاصيل الأكثر دقة
يعنى مثلا:
لو عندنا صورة عصفورة :
هنقص الجسم كله من أول صورة
و من تانى صورة هنق الجسم بالديل بالجناحين مع بعض , و الراس لوحدها
من الصورة التالتة هنفصل العنين و المنقار من الراس , و هنفصل الجناح و الديل عن الجسم
و من الصورة الرابعة هنقص الننى بتاع العين , و هنفصل المنقار عن بعضه ( الشفة العليا و الشفة السفلى )
و بالنسبة للجسم هنفصل الريشات من الديل و الجناح عن بعضها
بعد كدة هنعمل تانيات فى أطراف الجزيئات اللى قصيناها دى كلها بنفس الأسلوب اللى بنتبعه مع شرائط الهدايا ( بالمقص و هو مفتوح بتحطى سلاح المقص و نشد برفق فتتنى الأطراف )
4
بعد كدة بنجيب أنبوبة سليكون من محلات الحدائد و البويات
و بنملاء داخل التجويفات اللى عملناها فى الجزيئات و نلزق كل قطعة فوق الأخرى من غير ما نضغطجامد , يادوب خفيف خفيف
يعنى
الصورة الأولى تتلزق
و بعدين تتلزق أجزاء الصورة التانية فوقها .. و نخليها مرفوعة عنها شوية
نسيبها كام ساعة لغاية ما ينشف السليكون
ناخد أجزاء الصورة التالتة و نملاء داخلها بالسليكون و نحطها بالراحة , و بمجرد لمس خفبف علشان ما تتبططش و تفضل بارزة
و نسيب السليكون ينشف........ و هكذا
5
بعد ما كله ينشف بنجيب فلوت ( ورنيش تلميع الخشب ) برضو من محلات الحدايد و البويات
و بندهن اللوحة اللى عملناها كلها بالفلوت
و ننتظر كام ساعة على ما تنشف ثم ندهنها كمان مرة
و كل ما دهنّاها أكتر كل ما كانت الصورة بتلمع أكتر و جامدة أكتر
و عن تجربة :
أنا عاملة 3 لوحات معلقاهم فى الحمام ( يعنى بيتعرضوا للمياه و البخار كل يوم ) بقالهم 17 سنة و ما شاء الله لسة زى ما هم
زى ما إنتم شايفين فى الصورة رقم 3 بنقصقص التفاصيل أكتر و أكتر إزاى
و فى الصورة 6 بتشوفوا إزاى بنلزق كل جزء فوق التانى ( الأكبر فالأصغر )
معلومة:
ممكن كمان نعمل الشغل دة على أى سطح تانى غير ورق ناصيبيان : لوحة خشب , زجاج فيميه أو مضلع , مرايا .. و ممكن بلاطة سيراميك ........الخ
و بدل ما نشترى كروت
ممكن نرسم بنفسنا الرسمة و نلونها بأى ألوان : فلوماستر , أقلام , جواش ...الخ
و بعد كدة ندهن الرسمة بالفلوت من الوجه
و لما ينشف الفلوت دهن ظهر الصورة
بعد كدة نقصها
الدهان دة بيليها تتنى و تتشكل بالمقص بسهولة زى الكارت
و طبعا نكمل بعد كدة بنفس الطريقة
ممكن كمان بدل ما نعمل 4 طبقات ممكن تبقى طبقة واحدة
بس نراعى إن أطرافها تكون متنية قوى ونحشيها بسليكون كتير علشان البروز يبقى واضح
و الطريقة دى مجرباها برضو و نتيجتها فى منتهى الجمال لكن الحقيقة اللى بتبقى ب4 طبقات بتبقى أجمل
زى ما إنتم شايفين فى الصور دى إزاى بنقصقص التفاصيل أكتر و أكتر
و شوفوا لو بصينا من الجنب على السليكون اللى بين طبقات الصورة :
و أدى كمان صور من الديكوباج البارز
أتمنى تعجبكم
و تفيدكم
أتمنى تعجبكم
و تفيدكم
و كمان صور
فن رائع وتسلم ايد الفنان المبدع بس كنت احب التفصيل بالصور بجانب الكتابه
ردحذفما شاء الله تبارك الله أعمال جميلة وأفكار حلوه - جزاك الله خير .
ردحذف